إيه هو النياسيناميد اللي طالع موضة الأيام دي ؟ كل السوشيال ميديا وصفحات البنات بتتكلم عنه.
وياترى هو مادة سحرية فعلا وبتحل مشاكل كتير في البشرة ولا هو ترند وملهوش لازمة؟
في المقال ده هعرفك هو إيه النياسيناميد ده وبيعمل إيه عشان تقرري مناسب ليكي تدخليه في روتينك ويستاهل ولا ترند.
إيه هو النياسيناميد ؟
هو شكل من أشكال فيتامين B3 مهم جدا للبشرة في الاستخدام الموضعي.
المميز في النياسيناميد إنه مناسب لجميع أنواع البشرة ( الدهنية والمختلطة والجافة حتى الحساسة).
والجميل فيه إنه ينفع نستخدمه لوحده أو مع مواد فعالة تانية بيشتغل في تناغم جميل معاها.
7 فوايد لمادة النياسيناميد حتقرري بعدها ليه حتدخليه في روتينك
لو بشرتك فيها مشاكل كتير اعرفي الأول النياسيناميد بيعمل إيه عشان تقرري حيكون معاها حلو ولا لأ.
1. بيقلل المسام الواسعة (Pore Minimizer)
ودي أشهر فايدة للنياسيناميد، بيخلي شكل المسام أصغر وأنعم بكتير.
لإنه بينظم إفراز الدهون، فالمسام مش بتتملي وتوسع وتظهر بشكل واضح.
2. بيقوي حاجز البشرة (Skin Barrier)
حاجز البشرة هو الي بيحافظ على بشرتنا بيكون زي درع حماية ليها عن طريق مواد بتكون فيها وهي السيراميد.
النياسيناميد بقى بيحفز إنتاج السيراميد (Ceramides) الدرع الأسي للبشرة بتحافظ على رطوبتها وحمايتها من المؤثرات المضرة.
لما حاجز البشرة يبقى قوي، بشرتك هتحتفظ بالرطوبة وقت أطول وبتبقى مقاومة أكتر للبكتيريا والجفاف.
3. تنظيم إفراز الدهون (Oil Control)
أصحاب البشرة الدهنية والمختلطة، ده هيكون الصديق المثالي ليكم.
هو بيبعت إشارات للغدد الدهنية عشان تنظم افراز الزيوت والدهون، فوشك ميبقاش بيلمع طول اليوم، وبالتالي بيقلل فرصة ظهور الحبوب.
4. تفتيح البقع وآثار الحبوب (Hyperpigmentation)
لو عندك من آثار حبوب قديمة أو بقع شمس، النياسيناميد بتركيزات معينة (من 2% لـ 5%) بيقدر يمنع انتقال الصبغة (الميلانين) لسطح الجلد، فمع الوقت بيوحد لون البشرة وبيدي نضارة ملحوظة ومثالي جدا لأثار الحبوب الحمراء.
5. مضاد للالتهاب والاحمرار
لو بشرتك حساسة فيها احمرار أو التهاب أو حبوب ملتهبة أو عندك "وردية" (Rosacea)، النياسيناميد بيشتغل كمهدئ ممتاز وبيقلل الاحمرار والتهيج بشكل ملحوظ جداً.
6. محاربة التجاعيد والخطوط الرفيعة
عشان بيزود إنتاج الكولاجين وبيتشغل كمضاد للأكسدة، فمع الاستمرار عليه بيخلي البشرة مشدودة وشكلها صحي أكتر.
7. بيحمي من أضرار الشمس
مش بديل للصن بلوك طبعاً بس عشان هو مضاد أكسدة ممتازومضاد للالتهاب، فبيساعد في إصلاح الخلايا المتضررة من الأشعة فوق البنفسجية، و بيشتغل كخط دفاع تاني.
إيه الأشكال اللي بييجي فيها النياسيناميد؟
النياسيناميد موجود في منتجات كتير جداً في السوق، وكل شكل وليه استخدامه:
1. السيروم (Serum)
-
وده الشكل الأشهر والأكثر تركيزاً. بيكون قوامه خفيف (مائي أو جل).
-
ليه ممكن تختاريه؟: لو عايزة تعالجي مشكلة محددة بسرعة (زي المسام الواسعة أو الدهون واللمعان) وعايزة تركيز عالي من المادة الفعالة يدخل عمق البشرة.
2. الكريم المرطب (Moisturizer)
-
كريمات ترطيب كتير دلوقتي بتضيف النياسيناميد ضمن مكوناتها.
-
ليه تختاريه؟: لو بشرتك جافة أو حساسة جداً وخايفة من السيروم المركز. هنا بتاخدي الترطيب مع الفايدة العلاجية في خطوة واحدة.
أو لو بشرتك دهنية وعايزة كريم مرطب يساعد في تقليل اللمعان برده ويوازن الدهون.
3. التونر (Toner)
-
سائل خفيف بيستخدم بعد الغسول بنستخدمه عشان نقفل المسام.
-
ليه تختاريه؟: كخطوة تحضيرية لزيادة الامتصاص وحاجة تقلل شكل المسام، أو لو روتينك بسيط وعايزة حاجة سريعة تديكي نضارة.
4. الغسول (Cleanser)
-
بالرغم إنه موجود في غسولات كتير، بس تأثيره هنا بيكون ضعيف لإنه بيتغسل بسرعة ومش بيلحق يقعد على البشرة وقت كافي فبيكون عامل مساعد مش أكتر من ضمن الروتين. والأفضل لحل المشكلة نعتمد على سيروم أو كريم.
التركيزات المستخدمة من النياسيناميد: هل تركيز الـ 10% أحسن من الـ 5%؟
مش دايما التركيز الأعلى هو المناسب، بالعكس في استخدام مادة زي النياسيناميد يفضل ندخلها الروتين تدريجي لحد م البشرة تتعود عليه.
تركيز 2% - 5%: أثبتت الدراسات العلمية إن النياسيناميد فعال جداً في علاج التصبغات والمسام عند التركيزات دي، مع أقل فرصة للتهيج. ده الأنسب لأغلب الناس.
تركيز 10% - 20%: فيه براندات كتير نزلت التركيزات العالية دي. هي فعالة طبعاً، بس ممكن تسبب تحسس، احمرار، أو حبوب تحت الجلد (Purging) لو بشرتك حساسة أو دخلتيه بشكل مفاجئ.
خليكي فاكرة الأضمن دايما ندخله تدريجي بتركيزات صغيرة ونبتدي نزود لو احتجنا تركيز أعلى.
طريقة استخدامه في روتينك
النياسيناميد مادة مرنة جداً، تقدري تستخدميها صبح وليل، وكل يوم.
الترتيب الصح في الروتين:
-
الغسول: اغسلي وشك كويس بالغسول المناسب لنوع بشرتك.
-
التونر (اختياري): لو بتستخدمي تونر، حطيه واستني ينشف شوية.
-
خدي 2-3 نقط بس كفاية.
-
وزعيه بطريقة الطبطبة على الوش والرقبة.
-
المرطب: خطوة أساسية بعده طبعا.
-
واقي الشمس (Sunblock): أساسي معانا.
فيه اشاعات وخرافات كتير بتطلع على النياسيناميد خليني أرد ع الأسئلة اللي معظم البنات بتسألها.
س: هل ينفع أستخدمه مع فيتامين سي (Vitamin C)؟
ج: الأبحاث بتقول إنه آمن تماماً تستخدميهم مع بعض، وبالعكس بيكملوا بعض (واحد بيفتح والتاني مضاد للأكسدة). بس لو بشرتك حساسة، الأفضل تفصليهم مش في وقت واحد (واحد الصبح وواحد بالليل) عشان تتجنبي أي احمرار مؤقت.
س: هل ينفع استخدمه مع الريتينول (Retinol)؟
ج: دول بقى مع بعض حلوين جدا! النياسيناميد بيقوي حاجز البشرة وبيهدي الالتهاب، وده بيساعد جداً في تقليل الآثار الجانبية للريتينول (زي الجفاف والتقشير). استخدمي النياسيناميد الأول وبعده بشوية الريتينول وفيه بعض البراندات بقوا يدمجوهم مع بعض في منتج واحد عشان يعززوا النتيجة.
س: هل ينفع مع أحماض التقشير (AHA/BHA)؟
ج: ينفع، بس بحذر. لو بتستخدمي مقشر قوي زي أحماض الفواكه (زي حمض الجليكوليك أو الساليسيليك)، يفضل متستخدميش سيروم نياسيناميد عالي التركيز في نفس الوقت عشان وشك ميلتهبش مع مراعاة إن بعض سيرمات النياسيناميد بيكون فيها سالسيلك أسيد برده لتعزيز النتيجة.
الأفضب خليهم في أوقات مختلفة (المقشر بليل والنياسيناميد الصبح أو نفصل في الأيام برده).
نيجي لأشهر سؤال النياسيناميد طلعلي حبوب.. ليه؟
ج: ده ممكن يحصل لسببين:
-
التركيز عالي: بشرتك مستحملتش الـ 10% أو الـ 20%. لازم توقفي فورا وتستخدمي تركيز أقل.
-
مدخلتيش المنتج تدريجي وطبيعي يحصل PURGING لحد ما بشرتك تاخد عليه.
-
حساسية لمواد تانية في المنتج: ممكن السيروم يكون فيه مواد تانية (زي الزنك أو مواد حافظة) هي اللي عملتلك حساسية، مش النياسيناميد نفسه.
الخلاصة:
النياسيناميد (Vitamin B3) هو فعلاً مكون ممتاز لبشرتك لو قررتي تدخليه روتينك، لوعايزة تحافظي على نضارة بشرتك، أو عايزة تهتمي بمكافحة التجاعيد. والاختيار المثالي اللي لا غنى عنه للمسام الواسعة، الدهون الزيادة، وتوحيد لون البشرة.
نصيحتي ليكي
-
الصبر: مفيش منتج بيدي نتيجة من يوم وليلة. النياسيناميد بيحتاج من 4 لـ 8 أسابيع عشان تشوفي نتيجة واضحة خصوصا في المسامات.
-
التدريج: ابدأي بتركيز قليل (5%) وكمية قليلة.
-
الاستمرارية: الروتين الناجح هو الروتين المستمر.
ودلوقتي بعد ما عرفتي فوايد النياسيناميد وطريقة استخدامه هتقدري تقرري هو حقيقة ولا ترند ومناسب لروتينك ولا لأ
لو محتاجة مساعدة في اختيار منتج فيه النياسيناميد مناسب لميزانيتك ونوع بشرتك ومشكلتك.. سيبيلنا كومنت وحنرد عليكي.